Биылғы жылдың алты айының қорытындысы бойынша біздің республикамыздың екінші деңгейдегі банктері активтерінің жалпы сомасы 2019 жылдың осы кезең көрсеткішімен салыстырғанда 13%-ға өсті, алайда, оларға қатысты 87 ықпал ету шаралары қолданылды, деп хабарлайды «Хабар24» ақпарат ресурсы.
Атап айтқанда, биылғы жылдың бірінші жартыжылдығында екінші деңгейдегі банктердің қызметінде банктік қарыздар мен банктік шоттарға, сондай-ақ төлемдер мен ақша аударымдарына қызмет көрсетуді жүзеге асыруға байланысты бұзушылықтар анықталды.
Қазақстанның банк заңнамасында және республика Ұлттық Банкінің нормативтік құқықтық актілерінде белгіленген нормаларды бұзғаны үшін 8 қаржы институтына айыппұл салынды, олардың жалпы сомасы 47,6 миллион теңгені құрады.
Қазақстанның екінші деңгейдегі бірқатар банктері белгіленген нормаларды сақтамағаны үшін қадағалау ден қоюдан ұсынымдық шаралар және жазбаша нұсқамалар алды.
Бүгінгі күні біздің республикамызда 27 екінші деңгейдегі банк жұмыс істейді, олардың 14-і шетелдің қатысуымен жұмыс істейді. Осы жылдың алты айының қорытындысы бойынша олардың активтерінің жалпы сомасы 28,2 триллион теңгеге жетті.
Сурет: liter.kz
