Жыл басынан бері адвокаттар сапасыз құқықтық көмек көрсеткен, сондай-ақ кәсіби қателер жасаған жағдайда Қазақстан азаматтары сақтандыру өтемін ала алады. Бұл туралы zakon.kz хабарлады.
Әділет министрлігінде атап өткендей, құқықтық көмек көрсету клиент пен адвокат арасында жасалатын заң көмегін көрсету шарты негізінде жүргізіледі. Оны жасаған кезде клиент адвокаттардың кәсіби жауапкершілігін сақтандыру туралы шарттың көшірмесін, сондай-ақ төлем туралы растайтын құжатты ұсынуды талап етуге құқылы.
Сақтандыру төлемі адвокаттар немесе заңгерлер мен сақтандыру компаниясы арасында жасалған сақтандыру келісімшарты негізінде жүзеге асырылады. Сақтандыру төлемдерінің мөлшерін, сондай-ақ кәсіби қателік фактісін сот шешеді, деп хабарлады департамент.
Мысалы, егер адвокат немесе заң кеңесшісі өзінің әрекетсіздігі себебінен апелляциялық шағым беру мерзімін өткізіп алса немесе өтінішті дұрыс жазбаса, онда клиент сақтандыру шартын жасаған сақтандыру компаниясы тарапынан шығындарды өтеуге құқылы.
Соңғы екі жылда Әділет министрлігіне адвокаттардың құқықтық көмек көрсету кезіндегі іс-әрекетіне немесе әрекетсіздігіне 600-ге жуық шағым келіп түскен.
Сурет: newtimes.kz
