Қазақстан Қауіпсіздік Кеңесінің хатшысы Қалмұханбет Қасымов қауіпсіздік мәселелері жөніндегі оныншы халықаралық кездесуге белсенді қатысты. Бұл туралы Қазақстан Президентінің ресми сайты хабарлайды.
Қауіпсіздік мәселелері жөніндегі халықаралық кездесуге 70-тен астам елдің өкілдері қатысты. Кездесу аясында қатысушылар терроризмге қарсы іс-қимыл, ақпараттық қауіпсіздік және төтенше гуманитарлық көмек саласындағы өзара іс-қимыл мәселелерін талқылады.
Қазақстандық өкілді Ресей Қауіпсіздік Кеңесінің Хатшысы Николай Патрушев шақырды.
Қазақ елінің өкілі Қалмұханбет Қасымов халықаралық кездесуде “Гибридті қауіп-қатерлердің өсуі жағдайында ұлттық қауіпсіздікті және мемлекеттердің тұрақты дамуын қамтамасыз ету” тақырыбында баяндама жасады.
Қазақстан Қауіпсіздік Кеңесінің хатшысы Халықаралық кездесу аясында Беларусь Республикасы Қауіпсіздік Кеңесінің Мемлекеттік хатшысы Станислав Засеммен, Ауғанстан Ислам Республикасы Президентінің Ұлттық қауіпсіздік жөніндегі кеңесшісі Хамдулла Мохибпен және Израильдің Ұлттық Қауіпсіздік Кеңесі төрағасының орынбасары Эйтан Бен Давидпен кездесті.
Өкілдер халықаралық кездесудің қорытындысы бойынша өңірлік және жаһандық қауіпсіздік мәселелері бойынша пікір алмасты және қауіпсіздік саласындағы өзара ынтымақтастықты талқылады.
Сурет: bnews.kz