Қазақстан Республикасының Қорғаныс министрлігі “Қазақстан Республикасының Үкіметі мен Ауғанстан Ислам Республикасының Үкіметі арасындағы әскери ынтымақтастық туралы келісімге қол қою туралы” үкімет қаулысының жобасын дайындады деп хабарлайды KAZ.NUR.KZ.
Жобаны қабылдауға тиісті нормативтік құқықтық актілерге, Қазақстан Республикасы ратификациялаған халықаралық шарттардың нормаларына, Қазақстан Республикасы қатысушы болып табылатын халықаралық ұйымдардың шешімдеріне, Үкімет пен Кеңсе басшылығының хаттамалық және өзге де тапсырмаларына жасалған сілтемесі бар жобаны қабылдаудың негіздемелері және/немесе оны қабылдау қажеттілігінің басқа да негіздемелері негіз болып табылады. Тараптар арасындағы ынтымақтастықты келесі бағыттар бойынша жүзеге асыру жоспарланған: стратегиялық деңгейде жылына 1 рет өткізілетін екіжақты кездесулер барысында аспектілерін талқылау жүзеге асырылатын қорғаныс саясаты; өзара оқу курстарындағы әскери ғылым, білім және медицина; Тараптар қарулы күштерінің материалдық-техникалық қамтамасыз етілуі және техникалық жәрдем көрсету; жауынгерлік даярлық; әскери барлау.
Ынтымақтастықтың белгілі бір бағыттарын жүзеге асыру үшін тараптар жеке келісімдер жасай алатындығы көрсетілген. Келісім ынтымақтастықтың келесі түрлерін қарастырады: стратегиялық деңгейде жыл сайын және жедел деңгейде әрбір алты айда екіжақты кездесулер өткізу; бірлескен ғылыми-әскери зерттеулер жүргізу, жедел-әскери конференциялар мен семинарларға қатысу; оқу орындарында әскери қызметшілерді оқыту және олардың біліктілігін арттыру; Тараптардың қарулы күштерін жарақтандыруда және қару-жарақты жаңғыртуда өзара көмек көрсету; бірлескен әскери оқу-жаттығулар өткізу және әскери оқу-жаттығуларға байқаушы ретінде қатысу; нұсқаушылармен, оқыту әдістерімен және тәжірибе алмасу. Келісім бес жыл мерзімге жасалады және егер Тараптардың бірде-біреуі бастапқы немесе кез келген келесі кезең аяқталғанға дейін алты айдан кешіктірмей өзінің осы Келісімнің қолданысын ұзартпау ниеті туралы екінші Тарапты дипломатиялық арналар арқылы хабардар етпесе, ұқсас кезеңдерге автоматты түрде ұзартылады.
