Қазақстан Сыртқы саясат ведомствосының басшысы Мұхтар Тілеуберді Ауғанстандық әріптесі Мохаммад Ханиф Атмармен телефон арқылы сөйлесті. Бұл туралы Қазақстан Республикасы Сыртқы істер министрлігінің баспасөз қызметі хабарлады.
Сөйлесу барысында Мұхтар Тілеуберді біздің еліміз Ауған тарапына азық-түлік тауарлары түрінде ізгілік көмек жіберуге ниеттеніп отырғанын мәлімдеді.
Ауған СІМ басшысы өз кезегінде Қазақстанға алғысын білдіріп, оның елі біздің республикамыздан астық пен оның өңделген өнімдерін сатып алуға мүдделі екенін мәлімдеді.
Сонымен қатар, Ауғанстан Қазақстан Республикасымен энергетика және көлік-транзит салаларындағы ынтымақтастықты дамытуға қызығушылық танытты.
Ауған Сыртқы істер министрі оның елі Ауғанстан азаматтары үшін қазақстандық білім беру бағдарламасының алдағы уақытта да жұмыс істегенін қалайтынын айтты.
Қазақстан Сыртқы саяси ведомствосында екі елдің СІМ басшылары арасында телефон арқылы сөйлесу ауған тарапының бастамасы бойынша өтті.
Бұрынырақ Қазақстан Орталық Азияның екі еліне — Қырғызстан мен Тәжікстанға ұн түрінде ізгілік көмек жібергені хабарланған.
Сурет: rbc.ru
