Сұлтанда жаңартылатын энергия көздері жөнінде саммит өтуде.Оған Қазақстан, Ресей, Оңтүстік Корея, Украина, Ұлыбритания, Израиль, Кувейт, Таиланд, Қырғызстан, Франция, Италия, Түркия, Германия, Өзбекстан, Испания, Грузия, Үндістан, Греция, Болгария және АҚШ делегациялары қатысуда.
Бұл ауқымды іс-шараның ұйымдастырушылары еліміздің жаңартылатын энергетика қауымдастығы мен Қазақстан Республикасының Тұңғыш Президенті Нұрсұлтан Назарбаевтың қоры болды.
Саммиттің ашылуында Тұңғыш Президент қорының атқарушы директоры Әсет Исекешев сөз сөйледі. Өзінің құттықтау сөзінде ол қор Қазақстандағы жаңартылатын энергия көздерін дамытуға қолдау көрсететінін атап өтті. Оның айтуынша, жасыл энергетика ел экономикасын дамытудың негізгі бағыттарының бірі болып табылады.
«Әлемдегі басты трендтер: ИИ, Big Data, жалпы цифрландыру, жаңа материалдар, жасыл экономиканы дамыту. Бұл бағыттар ел ең үздік стандарттар бойынша дами ма, өз азаматтарын лайықты өмір сүру сапасымен қамтамасыз ете ала ма, соны көрсетеді. Біз баламалы энергетика дамыған елдер белсенді дамып келе жатқанын көріп отырмыз. Германияда, мысалы, ЖЭК жалпы көлемнің 32% құрайды. Қазақстанда бүгін жалпы қуаты 900 МВт-тан астам ЖЭК-тің 81 объектісі жұмыс істейді. Үлесіміз әлі де айтарлықтай емес, бірақ негізгі жұмыс әлі алда», — деді Исекешев.
Сонымен қатар, ол дәстүрлі энергия көздері қазақстандық өнімнің бәсекеге қабілеттілігін жақсартатын маңызды фактор болып табылатынын атап өтті.
«Адамдардың түсінігінде «Жасыл» экономика — күн немесе жел станциялары, бірақ олай емес. «Жасыл» экономика — дамудың басқа сатысы және басқа өмір салты: экологиялық көлік, суды, жылуды және электр энергиясын дұрыс және үнемді пайдалану, құрылысқа жаңа тәсілдер енгізу, қоқысты жинау,оны кәдеге жаратуға дұрыс көзқарас, қалаларда жасыл атмосфераны қалыптастырудың жаңа тәсілдері, жасыл ауыл шаруашылығы. Бұның табиғатқа үлкен әсері бар, тек ел мен қала үшін ғана емес, әр адам үшін де физикалық және қаржылық ресурстарды үнемдеу», — деді Әсет Исекешев.
Саммиттің басты мақсаты жаңартылатын энергия көздерін пайдалану мәселелерін талқылау, сондай-ақ біздің еліміздің және бүкіл әлемдік қауымдастықтың «жасыл» болашағын құруға үлес қосатын идеялар мен ұсыныстарды іске асыру болып табылады.
Саммиттің соңында Қазақстан Республикасындағы жаңартылатын энергия көздері саласын дамытуға бағытталатын қарар қабылдау жоспарланып отыр.
Сурет: 24.kz
