Мәжіліс өкілдері Қазақстан Парламентінің жалпы отырысында «Қазақстан Республикасының Үкіметі мен Армения Республикасының Үкіметі арасындағы Азаматтық қорғаныс, төтенше жағдайлардың алдын алу және оларды жою саласындағы ынтымақтастық туралы келісімді ратификациялау туралы»заң жобасын мақұлдады. Бұл туралы ҚР Парламенті төменгі палатасының баспасөз қызметі хабарлады.
ҚР Ішкі істер министрлігінің басшысы Ерлан Тұрғымбаев жоғарыда аталған келісімге өткен жылдың 12 қыркүйегінде Қазақстан Ішкі істер министрі мен Армения төтенше жағдайлар министрінің кездесуі аясында қол қойылғанын айтты.
«Келісімде тараптардың бірінің аумағында төтенше жағдай туындаған жағдайда көмек көрсету үшін бірлескен іс-қимылдарды ұйымдастыру көзделген. Келісімді ратификациялау: біріншісі – төтенше жағдайлардың алдын алу, төтенше жағдайлардың туындау қаупі төнген жағдайларда халықты даярлау саласында тәжірибе алмасуға; екіншісі – тараптардың оқу орындарында азаматтық қорғаныс саласындағы мамандарды оқытуға; тараптар аумағында төтенше жағдайларды жою кезінде көмек көрсетуге мүмкіндік береді. Келісім құтқару бөлімшелерінің шекараларды оңайлатылған кесіп өту, сондай — ақ олардың тараптар аумағында болу шарттарын қамтиды», — деді Ерлан Тұрғымбаев.
Сондай-ақ, ішкі істер министрі құжатқа сәйкес елдер төтенше жағдайларды жоюда бір-біріне көмек көрсететінін хабарлады. Сонымен қатар Ерлан Тұрғымбаев бұған дейін осындай келісімдер Ресеймен, Беларусьпен, Қырғызстанмен, Әзірбайжанмен, Тәжікстанмен, Украинамен, Грузиямен жасалғанын хабарлады.
