Беларусь Президенті Александр Лукашенко 24-25 қазанда Қазақстанға ресми сапармен келеді, деп ХАА “ҚазАқпарат” БЕЛТҚА сілтеме жасап хабарлайды.
Беларусь басшысының баспасөз қызметі хабарлағандай, Александр Лукашенко Нұр-Сұлтанда Қазақстан Президенті Қасым-Жомарт Тоқаевпен келіссөздер өткізеді.
Мемлекет басшылары шағын және кең құрамдағы кездесуде сауда-экономикалық өзара іс-қимылды кеңейтуге баса назар аудара отырып, мемлекетаралық қатынастарды дамытуды талқылайды.
“Президенттер өнеркәсіптік кооперацияны кеңейту, экономиканың түрлі салаларында, соның ішінде ауыл шаруашылығында, көлік пен логистикада, мұнай – химия кешенінде, жоғары технологиялар саласында ынтымақтастықты арттыру перспективаларын қарастырады”,-деді Беларусь Мемлекет басшысының баспасөз қызметінде.
Тараптар сондай-ақ интеграциялық бірлестіктер аясындағы және халықаралық алаңдардағы ынтымақтастықты, өңірлік және әлемдік күн тәртібін талқылайды. Келіссөздер қорытындысы бойынша екі жақты келісімдер пакетіне қол қойылады.
Осы күндері Нұр-Сұлтанда Қазақстан-Беларусь бизнес-форумы өтеді. Қазақстан астанасында Беларусь дипмиссиясы ғимараттарының жаңа кешенін ашу жоспарланған.
