Әл-Фараби атындағы Қазақ ұлттық университетінің ректоры Ғалым Мұтанов Сауд Арабиясының астанасына ресми сапармен барды.Онда осы елдің білім министрлігінің басшысы Хамад бин Мухаммад Әл аш-Шейх және Сауд королі атындағы университет ректоры Бадран Әл-Омармен бірқатар кездесулер өтті.
Бұл туралы «ҚазАқпарат» ХАА хабарлайды.
Еліміздің Сауд Арабиясындағы Төтенше және Өкілетті елшісі Берік Арын қатысқан Сауд Арабиясының білім министрімен кездесу барысында ғылым-білім беру саласындағы ынтымақтастыққа қатысты мәселелер қаралды.
Сондай-ақ, әңгіме аясында Сауд Арабиясының министрі Әл-Фараби атындағы Қазақ ұлттық университетінің жұмысы және Шығыстың ұлы ойшылы Әбу Насыр әл-Фарабидің 1150 жылдығына арналған жоспарланған іс-шаралар туралы хабардар болды.
Өз кезегінде Сауд тарапы қазақстандық жоғары оқу орнының аумағында Әл-Фарабидің ғылыми-технологиялық платформасын және «Жібек жолы университеттерінің альянсы» халықаралық IT-кластерін құруға қатысты жобаға қызығушылық білдірді.
Сауд Арабиясы Білім министрлігінің басшысы қазір онда елдің экономикалық және қоғамдық өмірін жетілдіруге бағытталған реформалар жүргізіліп жатқанын айтты. Сондай-ақ, ол ғылым-білім беру саласында біздің державамен ынтымақтастықты дамытуға дайын екендігін айтты.
Кездесу соңында қатысушылар ғылым-білім беру саласындағы екіжақты ынтымақтастықты одан әрі нығайту туралы уағдаластыққа қол жеткізді.
Сонымен қатар, тараптар біздің елден Сауд Арабиясының жоғары оқу орындарына студенттерді қабылдау шарттарын қайта қарауға келісті. Атап айтқанда, енді студенттер жетекші отандық жоғары оқу орындарымен келісілгеннен кейін жолдама алатын болады.
