“Ауыл” партиясының төрағасы Әли Бектаев өзі басқаратын саяси бірлестік алдағы Мәжіліс пен мәслихат сайлауларына қатысуға шешім қабылдағанын мәлімдеді, деп хабарлайды “ҚазАқпарат” ақпарат ресурсы.
Бектаевтың айтуынша, қазіргі жағдайда адамзат алдында бір мәселе тұр – адамдардың денсаулығы, олардың әл-ауқаты, азық-түлік қауіпсіздігі.
“Аграрлық кешенді көтеру арқылы ғана жаңа әдістерді қолдана отырып, тәжірибе жинақтай аламыз. Ең басты мақсаты ауыл шаруашылығын дамыту, ауыл халқының мүдделерін қорғау болып табылатын “Ауыл” халықтық-демократиялық патриоттық партиясы да осы сайлауда өзін танытуға тиіс. Сайлау – демократияның белгісі”, – деді Бектаев.
Президент Қасым-Жомарт Тоқаевтың Жарлығы бойынша парламент пен мәслихаттарға сайлаулары 2021 жылғы 10 қаңтарда өткізілуі тиіс. Оларды өткізуге, Ортсайлаукомның деректеріне сәйкес, 15,3 миллиард теңге жұмсау жоспарланып отыр, оның басым бөлігі сайлау комиссиялары мүшелерінің еңбегіне ақы төлеуге жұмсалады.
Қазір Мәжілісте үш саяси бірлестік – басқарушы Nur Otan партиясы, Қазақстанның Коммунистік Халық партиясы және “Ақ жол”демократиялық партиясы ұсынылған.
Сурет: 24.kz
