Атырау облысында Орал өзенінде мұздың еруіне байланысты өлі балық жинау жұмыстары күшейтілді, деп хабарлайды Атырау облыстық аймақтық байланыс қызметі.
«Арнайы автобазаның, облыстық орман шаруашылығы және жануарлар дүниесі инспекциясының, балық шаруашылығы басқармасының қызметкерлері су айдынын тазартумен айналысады. Қала аумағындағы өзеннің жағалау бөлігі және Геолог, Атырау Дамбы ауылдық округтерінде тазартылады. «Амангелді» жауапкершілігі шектеулі серіктестігінің балық аулау кемесі мұзды бұзады. Бұдан кейін табиғат пайдаланушы кәсіпорындардың өзен көлігінің көмегімен, өзеннің ені бойынша балық жинау жұмыстары жүргізіледі», — деді облыстық балық шаруашылығы басқармасының бастығы Артур Сәдібекұлы.
Жиналған өлі балық «Спецавтобаза» жауапкершілігі шектеулі серіктестігінің аумағында кәдеге жаратылатын болады. Облыстың балық ресурстарына келтірілген залал анықталады.
2018 жылдың соңында Атырауда балық жаппай қырылды. Қырылған балықтың бір бөлігі тез жиналды, қалған бөлігі мұз астында жиналмай қалды. Мамандар мұз ерігенде жұмысты қайта бастауға шешім қабылдады. Балықтың қырылуы фактісі бойынша 2 қылмыстық іс қозғалды. Тергеу амалдары жүргізілуде. Полицейлер мен ветеринарлар балық сату пункттерін бақылауда, экологтар күн сайын Орал суынан сынауға алады. Балықпен улану жағдайлары тіркелген жоқ.
Сурет: tengrinews.kz
