12 сәуір күні Орал өзенінде балықтың жаппай қырылу себептерін анықтайтын ведомствоаралық комиссия мүшелерімен журналистердің кездесуі өтті, деп хабарлайды ATPress.kz тілшісі.
Кездесу өткізу сенатор Сәрсенбай Еңсегеновтың бастамасы болатын. Ол Бас прокуратура, ішкі істер және Энергетика министрлігі, Ауыл шаруашылығы министрлігінің Балық шаруашылығы комитеті өкілдерінің қатысуымен өтті. ІІМ өкілі Мұхтар Қожаев екі қылмыстық істі – ҚР ҚК-нің 204-бабының 2-бөлігі (“Бөтен мүлікті абайсызда жою немесе бүлдіру”) және 328-бабының 3-бөлігі (“Суды ластау, қоқыстау немесе сарқылу”) бойынша тергеу жүріп жатқанын еске салды.
Осы істер бойынша 12 ақпанда сот-экологиялық сараптама тағайындалды. 3 сәуірде осы сараптаманың алғашқы нәтижелері шықты. Балықтың жаппай қырылуына хлормен улану себеп болды.
Өзеннің ластану көзін анықтау бойынша сараптама жалғасуда. Зерттеудің екінші бөлімінің нәтижелері техникалық құжаттаманың үлкен көлемін зерделегеннен кейін дайын болады. Сараптама нәтижелерін жария етуді созудың тағы бір себебі – өлген балықтарға қосымша сараптама жүргізу.
Сурет: Pxhere.com
