Атырау облысында кәсіпкер бюджет қаражатын аса ірі мөлшерде ұрлады. Ұрланған ақша тегін медициналық қызмет көрсетуге бөлінді, деп ҚР Қаржы министрлігі Қаржы мониторингі комитетінің баспасөз қызметі хабарлайды.
Қазақстан ҚМ Қаржы мониторингі комитетінің Атырау облысы бойынша ЭТД қызметкерлері Атырау қаласындағы екі кәсіпорынның басшысына қатысты қылмыстық істі аяқтады.
Компания директоры өзінің қызметтік жағдайын пайдаланып, 17 млн теңгеге жуық бюджеттік қаржы қаражатын жымқырды.
Ведомстводан хабарлағандай, ұрланған ақша мемлекеттік бағдарлама аясында «Атырау облысы бойынша әлеуметтік медициналық сақтандыру қоры» КЕАҚ-қа тегін медициналық қызмет көрсетуге бөлінді.
Өңірдің сот сараптамасы институты залалды растады.
Қаскүнем келтірілген залалды өтемеді, соның нәтижесінде оның мүлкіне тыйым салынды.
Атырау қалалық сотының шешімімен әйел кінәлі деп танылды.
Ведомствоның мәліметінше, оған қылмыстық жаза тағайындалды: қылмыскер жеті жыл алты ай бас бостандығынан айыру орындарында өткізеді.
Сонымен қатар, кәсіпкер 5 жыл мерзімге медициналық мекемелерде және денсаулық сақтаумен байланысты ұйымдарда басшылық лауазымдарды атқару құқығынан айырылды.
Сурет: nur.kz
