Атырау облысының прокуратурасында облыстық денсаулық сақтау басқармасы тарапынан бюджет қаражатының тиімсіз жұмсалғаны туралы мәлімделді.
Ағымдағы жылдың 25 маусымында Атырау облысы Денсаулық сақтау басқармасына” АТМА-Атырау әуежайы және тасымалдау ” АҚ-нан демеушілік көмек ретінде жеке қорғаныс құралдары: көзілдірік, қолғап, медициналық бетперде, комбинезон және қорғаныш экрандары берілді.
“Басқарма аталған қаражатты медициналық ұйымдарға бөлмей, ұзақ уақыт бойы барлық ұйымдарда қажетті қорғаныс құралдарының үш апталық қоры бар деген сылтаумен қоймада сақтаған. Сонымен қатар, прокуратураның қарсы тексеруі шілде айында Исатай аудандық орталық ауруханасымен 2,5 миллион теңгеге 500 дана қорғаныс комбинезоны мен 5 000 дана медициналық бетперде сатып алынғанын, ал Жылыой аудандық орталық ауруханасында қорғаныс құралдары мүлдем жетіспейтінін көрсетті (қажеттілік – 50 000 дана бет перде, 5 000 дана қорғаныс комбинезондар, 30 000 дана қолғап және 100 қорғаныс көзілдірігі)”, – деп атап өтті ведомствода.
Басқарманың әрекетсіздігі бюджеттің тиімсіз жұмсалуына әкелді, ал ауруханалар коронавирустық инфекциямен күресу үшін қажетті қаражат ала алмады.
Осы факті бойынша материалдар Сыбайлас жемқорлыққа қарсы ведомствоға тиісті тергеу жүргізу үшін жіберілді.
Сурет: zakon.kz
