Мемлекет басшысы Қасым-Жомарт Тоқаев Атырау және Ақтөбе облыстарының әкімдерімен өңірлердегі ағымдағы санитарлық-эпидемиологиялық және әлеуметтік-экономикалық жағдайды телефон арқылы талқылады, деп хабарлайды «ҚазАқпарат» ХАА, мемлекет басшысының баспасөз хатшысы Берік Уәлидің Facebook желісіндегі парақшасына сілтеме жасап.
Атырау облысының әкімі Махамбет Досмұхамбетов халықты вакциналау барысы туралы айтып, ірі өнеркәсіптік кәсіпорындардың сұранысына байланысты вакциналардың көлемін ұлғайту қажеттілігін атап өтті. Президентке Үкіметпен бірлесіп дамытудың кешенді жоспарын әзірлеу бойынша, Президенттің тапсырмасының орындалу барысы туралы мәлімет берілді, оны іске асыру облыстың әлеуметтік-экономикалық дамуына елеулі серпін беріп, жергілікті тұрғындардың өмір сүру деңгейін арттырады. Мемлекет басшысы Атырау облысының әкіміне медициналық қызмет көрсету саласындағы мәселелерді шешуді, мектептегі білім сапасын арттыруды тапсырды.
Ақтөбе облысының әкімі Оңдасын Оразалин коронавирустық инфекциямен күресуде қабылданып жатқан шаралар туралы есеп берді. Сондай-ақ, ол өңірдің әлеуметтік-экономикалық дамуының негізгі көрсеткіштері, соның ішінде инвестициялар тарту, тұрғын үй салу, индустрияландыру картасы аясында іске асырылып жатқан жобалар туралы баяндады. Сөйлесу соңында Қасым-Жомарт Тоқаев Оңдасын Оразалинге өңірдегі санитарлық-эпидемиологиялық ахуалды тұрақтандыруға және азаматтарды вакциналауды жандандыруға қатысты бірқатар тапсырма берді.
