Атырау облысының әкімі Махамбет Досмұхамбетов Теңізге жұмыс сапарымен барып, онда шұғыл кеңес өткізді, оның басты мәселесі ағымдағы коронавирус жағдайы болды, деп хабарлайды “Қазақпарат” ақпарат агенттігі.
Кеңес барысында облыс әкімі Теңіз кен орнында коронавирустық инфекцияның өршуі алаңдаушылық туғызатынын атап өтті.
Махамбет Досмұхамбетовтың айтуынша, бүгінгі таңда кен орнында 709 қызметкер COVID-19 жұқтырған.
Отырыс аясында аймақ басшысына Теңіз кен орнындағы ағымдағы жағдай туралы баяндама ұсынылды. Оны Теңізде құрылған жедел штаб басшысы Аслан Бекжанов дайындады.
Кездесу соңында Махамбет Досмұхамбетов уәкілетті органдарға вахталық кенттерде карантиндік шаралардың сақталуына және кен орнында дезинфекциялық жұмыстардың жүргізілуіне қатаң бақылау жасауды тапсырды.
Бұған дейін қазақстандық бас санитарлық дәрігер Айжан Есмағамбетова Теңіздегі коронавирустық инфекцияның өршуінен кен орны карантинге жабылуы мүмкін екенін айтты.
Сурет: inform.kz
