Атырау облысының басшысы Махамбет Досмұхамбетов әріптестеріне коронавирустық инфекциямен күресуге көмектесу мақсатында өңірге келген Мәскеу мен Астрахань облысының дәрігерлерімен кездесіп, оларға алғысын білдірді. Бұл туралы облыстық коммуникациялар қызметі хабарлады.
“Қалыптасқан күрделі эпидемиологиялық жағдайда ресейлік дәрігерлердің Атырауға келуі ұйымдастырылды. Бұл дер кезінде көмек болды. Бүгінде пациенттер саны азайып келеді. Атырауда коронавирустық инфекциядан сауығу қарқыны да жоғары. Бастапқыда облыста дәрігерлердің тапшылығы туындады. Қазір медицина саласы жас мамандармен толығып, сомен мәселе шешілуде”, – деді аймақ басшысы Махамбет Досмұхамбетов.
Облыстық кардиологиялық орталықтың қауіпті аймағында екі апта жұмыс істейтін Астрахань делегациясының жедел жәрдем станциясының дәрігері Анна Чепель атыраулық дәрігерлер өз ісінің нағыз кәсіпқойлары екенін айтты.
“Біздің Атыраудағы әріптестеріміз шынымен де тәулік бойы жұмыс істейді және жұмыста тұрады. Бұл өте үлкен еңбек. Біз бұған коронавирустық инфекция мен пневмониямен ауыратын науқастарды емдеуге тікелей қатысу кезінде куә болдық. Қазақстан тарапы қолданатын препараттар біздің емдеу хаттамасына толық сәйкес келеді”, – деді Анна Чепель.
Сурет: inform.kz
