Атырау облысының әкімі Махамбет Досмұхамбетов брифинг өткізді, оның барысында аймақта медицина қызметкерлерінің жетіспеушілігіне байланысты мәселені шешу жоспары туралы айтты.
Оның айтуынша, қазір облыста 278 дәрігер, оның ішінде анестезиолог-реаниматолог, акушер-гинеколог, эпидемиолог және инфекционист жетіспейді.
Облыс әкімі туындаған мәселені шешу туралы айта келе, Атырауға Ресей Федерациясынан мамандарды жұмысқа тарту арқылы дәрігерлер тапшылығын жою жоспарланып отырғанын атап өтті. Досмұхамбетовтың айтуынша, бұл мәселе пысықталып жатыр.
Сондай-ақ, ол кеше өңірге 220 миллион теңгеге ірі дәрі-дәрмек партиясы келгенін хабарлады. Келген дәрілердің арасында «Азитромицин», «Цефазолин» және «Цефтриаксон» сияқты қажетті медициналық препараттар бар.
Бұл дәрі-дәрмектер партиясы қалалық дәріханалар арасында ғана емес, аудандарға да таратылды. Сондай-ақ, ол осы аптаның соңында дәрі-дәрмектердің тағы бір ірі партиясы келетінін айтты.
