Атырау облысында 11 инвестициялық жоба жүзеге асырылуда. Бұл туралы облыс басшысы Махамбет Досмұхамбетовтың төрағалығымен өткен өңірге инвестициялар тарту мәселелері бойынша өткен кеңесте кәсіпкерлік және индустриялық-инновациялық даму басқармасы басшысының міндетін атқарушы Қаныш Мәмбетов мәлімдеді, деп хабарлайды «ҚазАқпарат»ХАА.
«Биыл жалпы құны 920,4 млрд теңге болатын 11 инвестициялық жобаны іске қосу жоспарланып отыр. Түйіршіктелген күкірт өндіру зауыты, тамақ қалдықтарынан органикалық тыңайтқыштар өндіру, бетон және темірбетон бұйымдарын шығару зауыты, газ-химия кмешенінің құрылысы, құрғақ құрылыс қоспалары өндірісі, геотекстиль шығару цехы, мұнай-газ саласына арналған техника дайындау зауыты сияқты объектілерді іске қосу көзделіп отыр», — деді Қаныш Мәмбетов. Өңір басшысы кеңес қорытындысы бойынша инвестиция тарту жұмыстарын жандандыруға, сондай-ақ іске асырылып жатқан жобаларды жоспарланған мерзімде аяқтауға нақты тапсырмалар берді.
