Парламент Сенатының Төрағасы Қасым-Жомарт Тоқаев Үкімет сағатында Еуразиялық экономикалық одақ интеграциялық бірлестік ретінде қарқынды дамып келе жатқанын мәлімдеді.
Сенат басшысы өз сөзінде 2019 жыл Еуразиялық экономикалық одақ үшін айтулы жыл екенін атап өтті. Биылғы жылы ЕАЭО туралы шартқа қол қойылған күннен бастап 5 жыл және Президент Нұрсұлтан Назарбаев қалыптастырған еуразиялық интеграция идеясына 25 жыл толады.
“Бүгін ЕАЭО интеграциялық бірлестік ретінде берік тұрып, өз дамуында қарқын алып келеді деп айтуға болады. Тауарлар, қызметтер, капиталдың бірыңғай нарығын қалыптастыру үшін мықты институционалдық негіз құрылды, Одаққа мүше мемлекеттер арасындағы өзара әрекеттердің тиімді форматтары әзірленді”, – деді Қасым-Жомарт Тоқаев
Сенат Төрағасы ЕАЭО жаһандық экономикалық байланыстар жүйесінде айтарлықтай салмаққа ие бола отырып, халықаралық қатынастардың маңызды факторына айналғанын атап өтті.
“Жалпы ЖІӨ шамамен 2 трлн долларды құрайтын, ал халық 180 млн адамнан асатын әлемнің көптеген мемлекеттері ЕАЭО-мен ынтымақтастыққа қызығушылық танытуда. Вьетнаммен еркін сауда аймағы құрылды, басқа мемлекеттермен осыған ұқсас аймақтар құру бойынша жұмыс жүргізілуде. ЕАЭО көлік-транзиттік әлеуетіне үлкен үміт артылуда. ЕАЭО-ның “Бір белдеу-бір жол” Қытай бастамасымен түйісуі өте перспективті көрінеді, бұл Еуразиядағы сауда-экономикалық байланыстарды жаңа деңгейге шығаруға мүмкіндік береді» – деп атап өтті Қасым – Жомарт Тоқаев.
Сурет: ia-centr.ru
