Қасым-Жомарт Тоқаевты “Манас” әуежайында Қырғызстан президенті Сооронбай Жээнбеков пен Қазақстан Республикасының Қырғыз Республикасындағы Төтенше және Өкілетті Елшісі Қайрат Нұрпейісов қарсы алды.
Мемлекет басшысының сапары бағдарламасы Қосоронбай Жээнбековпен екіжақты келіссөздерді, сондай-ақ Қазақстан Республикасы мен Қырғыз Республикасы Жоғары Мемлекетаралық Кеңесінің 5-ші отырысына қатысуды көздейді.
Сапар аясында жоғары деңгейдегі келіссөздер мен бірқатар екіжақты құжаттарға қол қою жоспарланған. Жоғары деңгейдегі келіссөздер барысында саяси, сауда-экономикалық, инвестициялық және мәдени-гуманитарлық салалардағы екіжақты өзара іс-қимылдың кең ауқымды мәселелері қаралады деп күтілуде.
Келіссөздер қорытындысы бойынша екі елдің көшбасшылары баспасөз үшін мәлімдеме жасайды. Сонымен қатар, Мемлекет басшысы Қырғызстан Президентімен бірлесіп “Ата-бейіт” ұлттық тарихи-мемориалдық кешені мен Шыңғыс Айтматовтың мұражай-үйіне барады.
Сонымен қатар, 28 қарашада Бішкекте Қасым-Жомарт Тоқаев Ұжымдық қауіпсіздік туралы шарт ұйымы (ҰҚШҰ) Ұжымдық Қауіпсіздік Кеңесінің сессиясына қатысады.
Іс-шараның күн тәртібі Ұйым аясындағы өзара іс-қимыл мәселелерінің кең ауқымын, сондай-ақ ағымдағы жылғы ҰҚШҰ қызметінің басым бағыттарын іске асырудың қорытындысын шығаруды қамтиды.
