Бүгін Нұр-Сұлтанда елорда әкімі Алтай Көлгіновтің төрағалығымен мәжіліс өтті. Күн тәртібіне індетпен күрес мәселелері қойылды. Бұл туралы қала әкімдігінің баспасөз қызметі хабарлайды.
Кеңес барысында Күлгінов карантин шараларын жеңілдеткеннен кейін, кейбір қалалықтар санитарлық нормаларды сақтауды тоқтатқанын атап өтті. Оның айтуынша, азаматтар саябақтарда жүргенде бетперде пайдаланбайды.
Елорда әкімінің айтуынша, елорда тұрғындарының белгіленген ережелерді сақтамауы коронавирустық инфекцияның жаңа өршуіне алып келуі мүмкін.
Осыған байланысты құқық қорғау органдарының қызметкерлеріне жұмысты күшейтілген режимде жалғастыру тапсырылды. Сонымен қатар, әкім оларға жұмыс істеуге рұқсат етілген нысандардың қызметіне күн сайын мониторинг жүргізуді тапсырды.
Алтай Көлгінов елордада босаңсуға болмайды, сондықтан қала тұрғындарына қатаң карантиндік талаптарды сақтау қажет деп атап өтті. Сонымен қатар, ол қаланың периметрі бойынша өткізу-бақылау пунктері де жұмыс істейтінін айтты.
Соңғы мәліметтерге сәйкес, Нұр-Сұлтанда коронавирусты жұқтырудың 1540 жағдайы тіркелді, ал елімізде олардың саны 7919.
