Бүгін Астана әкімі Бақыт Сұлтанов «Астана» концерт залында елорданың көп балалы аналарымен кездесу өткізді. Бұл туралы әкімдіктің баспасөз қызметі хабарлады.
Әкіммен кездесуге барлық тілек білдірушілер келіп, қала басшысына қала тұрғындарын толғандыратын сұрақтар қойды.
Өз сөзінде Бақыт Сұлтанов көп балалы аналардың бірде-бір өтініші жергілікті мемлекеттік органдардың назарынан тыс қалмайтынын айтты.
«Соңғы уақытта аудандық әкімдіктер мен салалық басқармалар азаматтарды қабылдау жұмыстарын жүргізді. Нәтижесінде аса мұқтаж отбасылардың деректер базасы жасалып, нақты қажеттіліктер мен проблемалар анықталды. Бірінші кезеңде азық-түлік, көмір, мектеп керек-жарақтарына жедел көмек көрсетілді. Біз әрбір отбасын қолдау бойынша жеке шаралар жоспарын әзірледік», — деді Бақыт Сұлтанов.
Қала әкімі жақын арада елордада апатты және ескі үйлерді бұзу бағдарламасы іске қосылатынын растады. Барлық аз қамтылған және аса мұқтаж көп балалы отбасыларды сапалы муниципалдық тұрғын үймен қамтамасыз ету жоспарлануда.
Сулет: inbusiness.kz
