«Астана» сөзі бар нысандардың атаулары қаланың атын өзгерткен соң өзгертілмейді. Бұл туралы «Хабар 24» телеарнасына берген эксклюзивті сұхбатында қала әкімі Бақыт Сұлтанов мәлімдеді.
Әкім «Астана Опера» немесе «Астана Арена» брендке айналды деп санайды, сондықтан оларды қайта атау керек емес. Маңдайшалар олардың тозуына қарай ғана ауыстырылады.
Сондай-ақ, әкім қайта атау үшін ең төмен сома жұмсалуы тиіс деп мәлімдеді. Ол қаладағы барлық шығындарды оңтайландыру жүргізіліп жатқанын және Нұрсұлтан Назарбаев әлеуметтік пакетті барынша күшейту жөнінде нұсқау бергенін, сондықтан ақша ең алдымен әлеуметтік қорғау саласын арттыруға бағытталатынын атап өтті.
Сондай-ақ, Сұлтанов қала тұрғындарының қала атауын өзгерткеннен кейін6 құжаттарды ауыстыру үшін халыққа қызмет көрсету орталықтарына барудың қажеті жоқ екендігін түсіндірді. Жаңа құжаттарды мерзімі өткен куәлік пен паспорттың иелері ғана алуы қажет
Әкімнің пікірінше, елорда тұрғындары астаналықтар деп аталуы керек.
Сурет: Хабар24
