ҚР Премьер-министрі Асқар Мамин жұмыс сапары барысында Қызылорда облысының Байқоңыр қаласының әлеуметтік-экономикалық дамуымен, сондай-ақ ғарыш саласындағы бірлескен қазақстан-ресей жобаларының жай-күйі мен перспективаларымен танысты, деп “ҚазАқпарат” хабарлайды ХАА ҚР Үкіметі басшысының баспасөз қызметіне сілтеме жасап.
Мемлекет басшысы Қ. Қ. Тоқаевтың Байқоңыр қаласын дамыту жөніндегі тапсырмаларының орындалуын бақылау аясында Асқар Мамин “Нұрлы жер”бағдарламасы бойынша салынған 50 пәтерлі бес үйдің алаңына барды.
Премьер-Министрге қаланы газдандыру және сумен жабдықтау, қонақ үй кешендерін қайта құру және салу, Байқоңыр қаласында “Байқоңыр” АЭА құру бойынша жұмыстардың жүргізілу барысы туралы баяндады.
“Союз МС-15” басқарылатын кемесінің ұшуын бірлесіп бақылағаннан кейін Үкімет басшысы “Роскосмос” ғарыш қызметі жөніндегі мемлекеттік корпорациясының бас директоры Д. Рогозинмен “Назарбаев старт”ғарыш зымыран кешенін құрудың қазақстандық-ресейлік жобасын іске асырудың өзекті мәселелерін талқылады.
2019 жылғы 7 қыркүйекте Мәскеу қаласында ҚР Тұңғыш Президенті-Елбасы Н. Назарбаев пен РФ Президенті В. Путиннің кездесуі барысында Ресей тарапы “Бәйтерек” жобасын “Назарбаев старт” деп өзгертуді, сондай-ақ “Союз-5” және “Союз-6” зымыран тасығыштарын ұшыру үшін әмбебап стартты көздейтін оны тиімді іске асыру үшін жаңа шарттарды қарастыруды, сондай-ақ басқарылатын бағдарламаны болдырмауды ұсынды.
