Арыс қаласының тұрғындары ертең, 28 маусым күні Шымкенттен үйге қайтады. Бұл туралы бүгін Түркістан облысының әкімі Өмірзақ Шөкеев мәлім етті.
Арыс қаласына ертең таңғы сегізден қайтуға болады. Тұрғындарды тасымалдау үшін арнайы автобус рейстері ұйымдастырылады.
“Мен жаңа ғана премьер-министрмен, Қорғаныс министрімен сөйлестім. Ертең таңғы сегізден бастап қала ашылады. Таңғы алтыда автобустар келеді”, – деді аймақ әкімі Өмірзақ Шөкеев.
Естеріңізге сала кетейік, 24 маусымда Арыс қаласында оқ-дәрі қоймасы жарылды. Шымкентке тұрғындарды шұғыл түрде эвакуациялады. Жарылыс салдарынан көптеген адам зардап шекті, үш адам қаза болды. Станция арқылы қалада барлық теміржол рейстері тоқтатылды.
Жарылыстың салдарынан көптеген тұрғын үйлер зақымдалып, өрт орын алды.
Бүгін Арыс тұрғындары наразылық белгісі ретінде Тамерлан тас жолын жауып, билік әрекетсіз және оларға ешқандай көмек көрсетпейді деп мәлімдеді.
Сурет: wikimaphia.org
