Арыс қаласының әскери бөлімінің командирі мен оның орынбасары қылмыстық құқық бұзушылық жасады деген күдікпен ұсталды. Бұл туралы ҚР Ішкі істер министрлігінің баспасөз қызметі хабарлады.
«2019 жылдың 23 тамызында ІІМ тергеу департаментінің әскери-тергеу басқармасы Арыс қаласының арсеналындағы жарылыс фактісі бойынша қылмыстық іспен әскери бөлімнің командирі мен оның орынбасары – артиллериялық оқ-дәрілерді сақтау базасының бастығы ұсталды», — деп хабарлады ҚР ІІМ-де.
Құқық қорғау ведомствосының ақпараты бойынша, командир мен оның орынбасары ҚР ҚК-нің 462-бабының 3-бөлігінде (жарылғыш заттармен жұмыс істеу ережелерін бұзу) және 453-бабының 2-бөлігінде (ауыр зардаптарға әкелген салғырттық) көзделген қылмыстарды жасады деп күдіктенуде.
«Сол күні Түркістан облысы Арыс ауданының соты аталған тұлғаларға қатысты 2 ай мерзімге «қамауда ұстау» бұлтартпау шарасын қолданды.Қылмыстық іс бойынша сотқа дейінгі тергеу жалғасуда», — деп қосты ведомстводан.
Сурет: 24.kz
