“Consolidated Contracting Engineering & Procurement s.a. l. Offshore (ССЕР)” Араб компаниясының басшысы Кауаш Хишам барлық Қазақстан халқынан тәртіпсіздік тудырған бейне үшін кешірім сұрады. Бұл туралы “ҚазТАГ”ақпарат агенттігі жазды.
“Мен Эли Дауданың іс-әрекеті үшін барлығынан кешірім сұрағым келеді. Мен ССС басшылығы мен қызметкерлерінің атынан бұл ССС саясатына, құндылықтары мен қағидаттарына сәйкес келмейтін жағымсыз оқиға болғанын айтқым келеді. Мен осы оқиға туралы естігеннен кейін ол жұмыстан босатылып, онымен келісім-шарт бұзылды”, – деді Хишам.
Араб компаниясының бас директоры компания ішінде тергеу жүргізіліп, орын алған оқиға бойынша барлық қажетті шаралар қабылданатынын хабарлады.
“Адал ниетпен,ССС қазақтарға құрметпен қарайтынын айтқым келеді. Мен болған оқиғаға байланысты тағы кешірім сұраймын. Мен осы оқиға және оқиға туралы естігеннен кейін, дереу Атырауға жағдайды шешу үшін ұшып шықтым. Бүгінгі таңда Теңгіздегі жағдай тұрақты, өлім-жітім, ауыр дене жарақаттары жоқ”, – деп толықтырды Хишам.
