Ұлы Отан соғысындағы Жеңістің 75 жылдығы қарсаңында Қарағанды облысының ардагерлеріне бір миллион теңгеден берілді. Бұл туралы «ҚазАқпарат» ақпарат агенттігі жазады.
Бұл туралы Қарағанды облыстық әкімдігі толығырақ мәлімет берді. Қазір өңірде 67 Ұлы Отан соғысының ардагері мен мүгедектері тұратынын, оларға бір миллион теңге көлемінде біржолғы материалдық көмек көрсетілгенін айтты.
Сонымен қатар, концлагер тұтқындарына және қоршауда қалған Ленинград тұрғындарына материалдық көмек көрсетілді. Оларға Қарағанды әкімдігі 200 мың теңгеден берді.
Қаза тапқан жауынгерлердің, тыл еңбеккерлерінің отбасылары да назардан тыс қалған жоқ. Тоғыз мыңға жуық адам облыстық атқарушы билік органынан 50 мың теңгеден алды.
Сонымен қатар, интернационалист-жауынгерлер — 596 адамға, Чернобыль атом электр станциясындағы апатты жоюшылар — 598 адамға материалдық көмек көрсетті. Оларға 100 мың теңгеден берілді.
Қарағанды әкімдігінің өкілдері Жеңіс күні қарсаңында материалдық көмек көрсетуге бөлінген ақшалай қаражаттың жалпы сомасы 757 миллион теңгені құрағанын атап өтті.
Сурет: Dixinews.kz
