Індеттің таралуын болдырмау мақсатында Қарағандыда тағы да қоғамдық орындарға дезинфекция жүргізіле бастады. Бұл туралы “Қазақпарат” ақпарат агенттігі хабарлайды.
“Астана” өңірлік қолбасшылығының биологиялық қорғау әскерлерінің бастығы Тайыр Сағынғанов Қарағандыдағы дезинфекциялық жұмыстар республиканың қорғаныс ведомствосының шешімімен қайта басталғанын айтты.
Оның айтуынша, қазір дезинфекцияға Қарағанды гарнизонының 50-ден астам әскери қызметшісі, 5 арнайы техника мен жеке құрамды тасымалдауға 3 КамАЗ жұмылдырылды.
Дезинфекциялық жұмыстар таңертең көшеде адамдар аз болғанда жүргізіледі, ал арнайы ерітіндімен өңделетін нысандарды қалалық әкімдік анықтайды.
Тайыр Сағынғанов қала тұрғындарының өмір қауіпсіздігін қамтамасыз ету және коронавирустың таралуын болдырмау үшін дезинфекция жүргізіліп жатқанын баса атап өтті.
Сонымен қатар, биологиялық қорғау әскерлерінің бастығы дезинфекция кезінде қолданылатын ерітінді қала тұрғындарының өміріне қауіп төндірмейтінін ескертті.
Бүгінгі таңда Қарағанды облысында коронавирустық инфекцияны жұқтырудың 956 оқиғасы ресми түрде тіркелді, ал Қазақстанда олардың саны 11796-ға жетті.
Сурет: inastana.kz
