Қарағанды облысында арнайы машиналар базасында патрульдеу сигналдық дауыс зорайтқыш құрылғысының ішінде орнатылған бес жылжымалы Ekin PATROL кешенінің көмегімен жүзеге асырылады. Бұл туралы облыстық ІІД баспасөз қызметі хабарлады.
Жылжымалы кешендер патрульдеу және тұрақ кезінде жылдамдық режимін бұзуды тіркей алады. Жол қозғалысы ережелерін бұзуды тіркеу полиция қызметкерлерінің қатысуынсыз автоматты түрде жүргізіледі. Осылайша, тәртіп бұзушының және полиция қызметкерінің тікелей байланысы болмаған жағдайда сыбайлас жемқорлық тәуекелге жол берілмейді.
Бұзушылықтар құрылғыдан Бас прокуратура серверіне автоматты түрде жіберіледі. Онда материалдар өңдеуден өтіп, «Қазпошта» арқылы жіберіледі.
«Қазіргі уақытта аталған автопатрульдер Қарағанды, Жезқазған, Балқаш қалаларында және Республикалық маңызы бар автожолдарда жұмыс істейді. Жоғарыда көрсетілген кешендерді енгізу және пайдалану апаттылық деңгейін төмендетуге және жол қозғалысына қатысушыларды жүргізу мәдениетін тәрбиелеуге бағытталған. Бүгінгі таңда Ekin PATROL кешендерімен 44 миллион теңгеден астам сомаға 4969 айыппұл анықталды, оның ішінде 24 миллион теңгеден астам сомаға 2797 айыппұл өндірілді», — деп хабарлады Қарағанды облысының полиция департаменті.
Сурет: inform.kz
