Бүгінгі таңда ішкі істер органдарының қызметкерлері әлеуметтік желілер мен жедел хабарламаларды үнемі қадағалап отырады. Бұл туралы inbusiness.kz ақпарат агенттігі хабарлады.
Мониторинг барысында Қарағанды облысында коронавирус инфекциясы туралы жалған ақпарат таратудың 4 фактісі анықталды. Осыған байланысты қылмыстық істер қозғалып, олардың әрқайсысы бойынша сотқа дейінгі тергеу амалдары жүргізілуде.
Сондықтан бас прокуратура өкілдері жалған ақпарат таратқаны үшін мың айлық есептік көрсеткішінен, 7 жылға дейін бас бостандығынан айырылу жазасы кесілетінін ескертеді.
Прокуратура қазіргі уақытта Қазақстанның құқық қорғау органдары нақты емес ақпарат авторларын анықтау үшін барлық қажетті технологиялық мүмкіндіктермен қамтамасыз етілгенін атап өтті. Оларға қатысты мемлекетіміздің заңнамасына сәйкес қатаң шаралар қолданылады.
Бұған дейін Қазақстан басшысы Қасым-Жомарт Тоқаев төтенше жағдайда ақпараттық қауіпсіздікті қамтамасыз етуге ерекше назар аудару керектігін айтқан болатын. Осыған байланысты ол коронавирус инфекциясы туралы жалған ақпараттардың алдын-алу жұмыстарын бақылауға алуды тапсырды.
Сурет: dailynews.kz
