Қазақстанның энергетикалық кешені жаңартылған энергия көздерінің тағы бір нысанымен толықты. Қарағанды облысында Балқаш маңындағы Гүлшат кентінде шетелдік инвестиция есебінен салынған өңірдегі екінші күн электр станциясы іске қосылды,деп хабарлайды облыс әкімдігінің баспасөз қызметі.
Облыс әкімі Ерлан Қожанов станция құрылысының мақсаты Нұрсұлтан Назарбаевтың Қазақстандағы баламалы энергия үлесін 30 пайызға жеткізу тапсырмасын орындау болып табылатынын атап өтті. Қошанов қаңтар айында Саран қаласында Орталық Азиядағы ең ірі күн станцияларының бірі болып табылатын, қуаты 100 мегаватт болатын осындай станция іске қосылғанын еске салды. Маусым айында Шет ауданында тағы біреуін іске қосу жоспарланып отыр
Гүлшатта күн станциясы бір жылдан аз уақыт ішінде салынды. 104 га жерге 120000 астам күн панелдері орналастырылды. Станция қуаты – 40 мегаватт. Бұл Балқаш сияқты бес қаланы электр қуатымен қамтамасыз ету үшін жеткілікті болады. Жыл сайын ол 58 миллион киловаттан астам электр энергиясын өндіреді.
Энергетика министрінің орынбасары Сұңғат Есімханов атап өткендей, Қарағанды облысы – баламалы энергетиканы дамыту бойынша көшбасшы. Облыс үлесіне жаңартылған энергия көздерін өндіру көлемінің жартысы келеді.
Станция құрылысы мен жабдықтарына 46 миллион $ шетелдік инвестиция салынды. Нысанның құрылысында 300 адам жұмыс істеді. Станцияға 20 маман қызмет көрсететін болады.
Инвестор одан әрі облыста инвестициялық жобаларды жүзеге асыруға қатысуды жоспарлап отыр.
Станцияның ашылу салтанатына Еуропалық қайта құру және даму банкінің, қазақстандық күн энергетикасы қауымдастығының өкілдері, ардагерлер, Балқаш қаласының құрметті азаматтары, жастар – «Жасыл экономика» байқауының жеңімпаздары қатысты
Сурет: баспасөз қызметі
