Қарағанды қаласында “БИПЭК Авто – Азия Авто” компаниялар тобының өкілдері санитарлық дәрігерлер мен еріктілерге карантиндік режимнің әрекет ету уақытында 7 автокөлікті пайдалануға тапсырды. Көлік және жүргізушілерге жалақы бойынша барлық шығындарды кәсіпкерлер өз мойнына алуға ниетті. Бұл туралы Қарағанды облысы әкімдігінің ресми сайтында айтылған.
“Коронавируспен күресетін қызметкерлердің жұмыс тәртібі мен жүктемесін бағалай отырып, біздің компания автокөліктерді тауарлар мен қызметтердің сапасы мен қауіпсіздігін бақылау департаментіне және еріктілердің облыстық штабына беру туралы шешім қабылдады. Олар азық-түлік пен жеке қорғану құралдарын мұқтаждарға жеткізе алады. Шопырлар ауысым сайын, тәулік бойы жұмыс істейтін болады”, – деді компанияның Қарағанды қаласындағы филиалының басшысы Хамит Боскумбаев.
Сондай-ақ, “ГросФарм”компаниясының қызметкерлері осы қиын уақытта көмек көрсетуде. Саран кәсіпорны автокөлік салондарына тегін дезинфекциялық қаражат берді.
“Мұндай көмек коронавирустың таралу ошақтарын оқшаулау және тез шығу үшін қажет. Әрбір сағат, әрбір минут маңызды – бізде қашықтық өте үлкен. Осындай қолдаудың арқасында біз індетті жеңеміз”, – деді Қарағанды облысындағы тауарлар мен қызметтердің сапасы мен қауіпсіздігін бақылау департаментінің бастығы Қанат Асқаров.
Бұған дейін Департаменттің қарамағына “9 регион”компаниясымен 6 автокөлік берілді. Кәсіпорын сондай-ақ өз шоферлерін ұсынды және автокөліктерді төтенше жағдайдың қолданыстағы кезеңі ішінде отынмен және жағармай материалдарымен қамтамасыз етуді жоспарлап отыр.
Сурет: lenta.inform.kz
