Энергетика министрі Қанат Бозымбаев БАҚ өкілдерінің алдында Үкімет таяу уақытта Қазақстанда АЭС салу туралы шешім қабылдамағанын және қазір осы салада зерттеулер жүргізіліп жатқанын айтты.
Қазақстанда атом электр станциясын салу мәселесі референдумда шешілетін болады. Бірақ әзірге Үкіметтің АЭС қажеттілігі туралы шешімі жоқ. Бұл туралы 20 маусымда халық алдында өткен есеп беру конференциясында энергетика министрі Қанат Бозымбаев мәлім етті, деп хабарлайды Zakon.kz тілшісі.
Ол атом станцияларын салу және атом энергиясын өндіру мүмкіндіктерін зерттеу бұрын жүргізілгеніне және болашақта жүргізілетініне назар аударды.
– Қазақстанда зерттеулер әрдайым жүргізілген, жүргізіледі және жүргізілуі мүмкін. Өйткені мұндай технологияларды білу, зерттеу реакторларында ғылыми зерттеулер жүргізе білу, негіздерді түсіну біздің елімізді дамыған мемлекеттер қатарына қосады. Мен бұл жұмыс жалғасады деп айтқым келеді, бұл зерттеулер, одан қорқудың қажеті жоқ. Бүгінде атом станциясын салу туралы ешқандай шешім жоқ, ешқандай билік деңгейінде жоқ, бұл тек қауесет ғана, – деп қорытты министр.
