Алматы халықаралық әуежайына бірнеше авиарейстер қайта іске қосылып, олардың санының артқанын айтты, деп хабарлайды “ҚазАқпарат” ХАА тілшісі.
“Бүгін Алматыдан Қырғызстан бағытында рейстердің қайта басталғанын қуана хабарлаймыз. Қырғыз Республикасына кіру үшін орыс немесе ағылшын тілдерінде теріс нәтижелі ПТР тестін ұсыну қажет. Анықтаманың жарамдылық мерзімі – талдау алынған сәттен бастап 72 сағат. 7 жасқа дейінгі балаларға ПТР тесті қажет емес”, – делінген әуежайдың Facebook-тегі ресми парақшасында.
Жарияланған хабарламадағы мәлімет бойынша, наурыз айында Киевке рейстер ашу жоспарланып отыр.
“Назар аударыңыз, Украина аумағына кіру үшін қазақстандықтарға ПТР-тест талап етілмейді. Алайда сақтандыру полисінің болуы міндетті шарт болып табылады. Полис елде болған барлық мерзімге ресімделеді, сақтандыру бағасы үш күн үшін 3,30 еуро + әрбір келесі күн үшін 0,80 Еуро. Полис Covid-19 жұқтырған жағдайда емдеуді, дәрі-дәрмектерді және ПТР тестін тапсыруды қамтиды. Сақтандыруды мында рәсімдеуге болады: www.visitukraine.today. Визаны рәсімдеу қажет болған жағдайда (Украина аумағында 90 күннен астам болған жағдайда) 30000 еуроны қамтитын сақтандыру полисі ресімделеді”, — деп атап өтті әуежайда.
Сонымен қатар, Алматыдан Мәскеуге (Домодедово) рейстер саны — сейсенбі және жұма күндері – аптасына 2 рет ұлғайтылды.
Халықаралық рейстерге билет сатып алғанда жолаушыларға елге кіру ережелері туралы қосымша кеңес алу ұсынылады.
