16 сәуірде Алматы қаласы әкімінің орынбасары Мақсат Кикимовтың төрағалығымен әлеуметтік әріптестік пен әлеуметтік және еңбек қатынастарын реттеу жөніндегі қалалық үшжақты комиссияның отырысы өтті, оның барысында әлеуметтік әріптестер қала әкімдігі, «Алматы қаласының Кәсіподақ орталығы» Аумақтық кәсіподақтар бірлестігі, «Алматы кәсіподақтар одағы» аумақтық кәсіподақтар бірлестігі және «ҚР жұмыс берушілердің (кәсіпкерлердің) Ұлттық Конфедерациясы» заңды тұлғалар бірлестігі арасында 2021-2023 жылдарға арналған өңірлік келісімге қол қойды, деп хабарлайды zakon.kz.
Сондай-ақ, отырыстың күн тәртібі еңбек қатынастарының еңбекақы төлеу бөлігін реттеу жөніндегі бірқатар маңызды мәселелерді қамтыды.
2018-2020 жылдарға арналған өңірлік Келісімнің қолданылу мерзімінің аяқталуына, сондай-ақ ҚР Үкіметі, қызметкерлердің республикалық бірлестіктері мен жұмыс берушілердің республикалық бірлестіктері арасындағы Бас келісімнің бекітілуіне байланысты 2021-2023 жылдарға арналған жаңа өңірлік келісімге қол қою қажеттілігі туындады.
Келісім аумақтық кәсіподақтар бірлестіктері, заңды тұлғалар бірлестігімен бірлесіп халықаралық еңбек ұйымының лайықты еңбек тұжырымдамасы қағидаттары негізінде әзірленді және әлеуметтік әріптестікті жетілдіруге, халықты тиімді жұмыспен қамтамасыз етуге, лайықты жағдайлар мен еңбекақы төлеуге бағытталған.
Жаңа келісімнің міндеті жұмысшылардың қолайлы және қауіпсіз еңбек жағдайларын жасау, алматылықтардың әлеуметтік-еңбек құқықтарын қорғауда жоғары нәтижелерге қол жеткізу болып табылады.
Мақсат Кикимов індет жағдайында жұмыс орындарын сақтау, жалақыны уақтылы төлеуді қамтамасыз ету мәселелері бірінші орынға қойылғанын атап өтті. Сондай-ақ, жұмыс берушілер мен жұмысшылардың мүдделерін қорғайтын кәсіподақтардың үлесі атап өтілді.
Әлеуметтік әл-ауқат басқармасы басшысының орынбасары Д.Әлкебайұлы қала кәсіпорындарында, оның ішінде банкрот кәсіпорындарда жалақы бойынша берешекті өтеу туралы баяндама жасады.
Жыл басынан бері еңбек инспекторлары 970 өтініш қарады, еңбек құқықтарын қорғауға бағытталған 80 тексеру жүргізілді, 55 бұзушылық анықталды, 3,8 млн теңгеге 23 заңды тұлға әкімшілік жауапкершілікке тартылды.
Қабылданған шаралардың нәтижесінде жалақы бойынша берешек 289,1 млн теңгеге төмендетілді, осылай 1507 жұмыскердің еңбек құқықтары қорғалды.
Отырыс барысында қызметкерлердің жалақысын төлемеу мәселелері бойынша ұжымдық өтініштер қаралды.
Отырыс қорытындысы бойынша әкім орынбасарына жалақыны уақытылы төлеуді қатаң бақылауға алу, дауларға жол бермей, жедел әрекет ету шараларын қабылдау тапсырылды және бірқатар нақты тапсырмалар берілді
