Жаһандық желінің қазақстандық сегментінде Алматыда covid-19 жұқтырған азаматтарға арналған модульдік аурухана салу кезінде миллиардтаған бюджет қаражатын жымқыру туралы ақпарат пайда болды.
Бұл коронавирус індеті басталғанда оңтүстік астанада 280 төсек-орынға арналып салынған бірінші модульдік клиника. Медициналық мекеменің жалпы ауданы 5 850 шаршы метр. Аурухана құрылысына 1300 адам, 88 техника жұмылдырылды.
Таратылған ақпаратта модульдік клиниканы салуға бөлінген 5,5 миллиард теңгенің 3,9 миллиард теңгесі ұрланғаны көрсетілген.
Бұл ақпаратты Алматының сыбайлас жемқорлыққа қарсы күрес ведомствосының қызметкерлері растады. Сондай-ақ, олар аталған факті бойынша қылмыстық іс қозғалғанын және тергеу жүргізіліп жатқанын хабарлады. Алайда, сыбайлас жемқорлыққа қарсы күресушілер бұл туралы тергеу құпиясын негізге алып, толық ақпарат берген жоқ.
Сурет: zakon.kz
