Қазақстанның оңтүстік астанасының әкімі Бақытжан Сағынтаев қаланың ІТ-қауымдастығымен кездесуінде сандық технологияларды қолдау және дамыту үшін арнайы кеңес құрылатынын айтты.
Кездесу барысында IT-саласын дамыту, қаланың тыныс-тіршілігіне қатысу және Алматы экономикасындағы үлесті кеңейту мәселелері талқыланды. Сондай-ақ, сандық компаниялардың мамандары осы саланы одан әрі қалыптастыру туралы өз ойларын айтты.
Кездесуге қатысушылар алдында сөз сөйлеген оңтүстік астананың басшысы Алматыны дамыту жөніндегі өткен кеңесте мемлекет басшысы Қасым-Жомарт Тоқаев қаланың тыныс-тіршілігінің барлық салаларын цифрландыру бойынша жұмысты жандандыруды тапсырғанын атап өтті.
“Сондықтан біз үшін сіздердің көмектеріңіз маңызды. Құрылатын IT-кеңес аясында айына бір рет жиналып, нақты сұрақтар қойып, олардың шешімін табатын боламыз. Ең бастысы, кеңес IT-саласын дамытуға қолайлы жағдай жасау үшін тиімді алаңға айналуы тиіс”, – деді Сағынтаев.
ІТ-саласын дамыту туралы айта келе, Бақытжан Сағынтаев қалалық әкімдік қажетті инфрақұрылымды құруға және барлық мүдделі тараптардың қызметін үйлестіруге көмек көрсететінін атап өтті. Оның айтуынша, қазір мегаполис экономикасының құрылымында осы сала маңызды орын алуы үшін, оны жақсарту міндеті тұр.
Сағынтаевтың айтуынша, Алматы IT-саладағы ең инновациялық және озық қалалардың біріне айналуы тиіс. Осы мақсатқа жету үшін барлық мүмкіндіктерді, оның ішінде бай адами капиталды, сондай-ақ ғылыми-зерттеу орталықтары мен жоғары оқу орындарының әлеуетін пайдалану қажет.
Сурет: in business.kz
