Алматыда Халыққа қызмет көрсету орталықтарының жұмысын қайта бастау туралы шешім қабылданды. Бұл туралы «Қазақпарат»ақпарат агенттігі жазады.
Мұндай шешімді қаланың бас санитарлық дәрігері Жандарбек Бекшин қабылдады. Енді оңтүстік астанада 16 фронт-кеңсе, оның ішінде 5 арнайы халыққа қызмет көрсету орталығы жұмысын бастады.
Бұл орталықтар қалада дүйсенбіден сенбіге дейін, 9:00-ден 18:00-ге дейін жұмыс істейді. Бұл ретте індетке байланысты онлайн-форматта ала амайтын қызметтер ғана көрсетіледі.
«Азаматтарға арналған үкімет» мемлекеттік корпорациясы Алматы филиалының директоры Данияр Кірікбаев барлық халыққа қызмет көрсету орталықтары карантиндік талаптарды қатаң сақтап жұмыс істеп жатқанын ерекше атап өтті.
Оның айтуынша, орталыққа бару үшін электронды Үкімет порталы немесе 1414 нөмірі арқылы кезекке тұру қажет. Кірікбаев алдын ала жазылусыз қызмет көрсетілмейтінін айтты.
Соңғы мәліметтерге сәйкес, Алматыда 2201 коронавирустық инфекцияны жұқтыру жағдайы ресми түрде расталды,ал Қазақстанда олардың саны 8531-ге жетті.
Сурет: 24.kz
