Алматы басшысының орынбасары Ержан Бабақұмаров Қаланың бас мемлекеттік санитарлық дәрігері Жандарбек Бекшинмен бірге бейнеконференцбайланыс форматында коронавирустық инфекцияға зерттеу жүргізілетін 6 зертхананың басшыларымен кездесу өткізді. Бұл туралы «Қазақпарат»жаңалықтар ресурсы хабарлайды.
Кездесу барысында Қазақстан Президентінің азаматтарды жаңа коронавирусқа тестілеу деңгейін арттыру жөніндегі тапсырмаларын орындау тетіктері талқыланды. Алматының алдында зерттеулер санын күн сайын 2,5 мың тестке жеткізу міндеті тұр. Сонымен қатар, зертханалардың функцияларын бөлу, сондай-ақ зерттелетін азаматтар контингенті бойынша мобильді бригадаларды бөлу мәселелері қаралды.
Коронавирусты диагностикалау бойынша жүргізіліп жатқан жұмыстар туралы Алматы қаласының бас мемлекеттік санитарлық дәрігері Жандарбек Бекшин айтып берді.
Бабақұмаров зертханаларды тұрақты тестілеу және оларды одан әрі ұлғайту үшін қажетті шығын материалдарымен қамтамасыз ету мәселелерін қозғады.
«Президенттің тестілеу көлемін арттыру жөніндегі тапсырмаларын орындау үшін кадрлық әлеуетті арттыру, сондай — ақ қосымша медициналық бригадалар құру қажет», — деді ол.
Алматы тауарлар мен қызметтердің сапасы мен қауіпсіздігін бақылау департаментіне қалалық қоғамдық денсаулық басқармасымен бірге бастапқы медициналық-санитарлық көмек мекемелерінің медициналық қызметкерлерін зерттеу материалдарын іріктеу әдістеріне оқыту жоспарын әзірлеу тапсырылды.
Сурет: lenta.inform.kz
