Алматы қаласы стратегия және бюджет басқармасы басшысының міндетін атқарушы Жанар Жазылтаева бүгін брифингте “Қатысу бюджеті” жобасы туралы айтты.
Оның айтуынша, өз жобаларын ағымдағы жылдың 19 тамызынан 1 қыркүйегіне дейін ұсынуға болады. Бұдан әрі сараптау комиссиясы оларды іріктейді, 20-29 қыркүйек аралығында жеңімпаз-жобалар жарияланады.
Сондай-ақ Жазылтаева жергілікті бюджет Алматы азаматтарының қатысуымен жасалғанын атап өтті.
“Қала тұрғындары бюджеттік үдерістің барлық сатысында – жоспарлау, талқылау және мониторингтеу, басым мәселелер бойынша қаржылық шешімдерді қарауға және қабылдауға үлес қосады. Алматыдағы “Қатысу бюджетінің” мақсаты – қала тұрғындарының ұсыныстары мен бастамалары негізінде мегаполис аудандарын дамыту және абаттандыру. Жобалық ұсыныстың авторы Қазақстан Республикасының азаматы, оралман, қала аумағында тұрақты тұратын шетелдік және азаматтығы жоқ адам болуы мүмкін”, – деді ол.
Авторлар бір жобадан артық ұсына алмайтынын ескеруі тиіс, сондай-ақ объект ортақ пайдалануға арналған, жеке учаскеде болмауы тиіс және оны іске асыру әкімдіктің мүмкіндіктері шегінде болуы тиіс.
Жобаға сәйкес қаланың 8 ауданының әрқайсысына 500 миллион теңге бөлінеді.
“Қабылданбаған жобалар бюджетті қалыптастыруға қатысты қоғамдық пікірді есепке алу үшін міндетті түрде бюджеттік бағдарламалар әкімшілеріне жіберілетін болады. Яғни, жеткілікті дауыс алмаған жобалар да есепке алынады”, – деді “Алматы қаласының даму орталығы” АҚ басқарма төрағасының орынбасары Олег Сек.
Сурет: Inform.kz
