Алматы қаласының Медеу аудандық соты белсенді Әсия Төлесоваға қатысты қылмыстық істі өндіріске қабылдады. Бұл туралы informburo.kz ақпарат агенттігі хабарлады.
Ішкі істер органдарының қызметкерлері ағымдағы жылдың 8 маусымында белсендіні ұстады. Ол митинг кезінде полицейдің фуражкасын қағып жіберіп, билік өкіліне қатысты зорлық-зомбылық көрсетті.
Оның ісін Алматы сотының судьясы Залина Махарадзе қарайды. Төлесова билік өкілін көпшілік алдында қорлау және зорлық-зомбылық жасағаны үшін айыпталуда.
Сот шешімі бойынша, процес кезінде Әсия Төлесова қамауда болады. Мұндай бұлтартпау шарасы өзгертуге немесе күшін жоюға жатпайды.
Оңтүстік астананың Медеу аудандық соты Төлесоваға қатысты ашық іс бойынша алдын ала тыңдау ағымдағы жылдың 7 шілдесінде бейнеконференцбайланыс арқылы өтетінін хабарлады.
Бұған дейін Залина Махарадзе жалған ақпарат таратқаны үшін айыпталған азаматтық белсенді Альнұр Ильяшевтің ісін қарады. Сот шешімімен ол қылмыс жасағаны үшін кінәлі деп танылып, үш жыл бас бостандығын шектеуге жазаланды.
Сурет: tengrinews.kz
