Алматыда Санкт-Петербург Үкіметінің мүшесі – ұлтаралық қатынастар және көші-қон саясатын жүзеге асыру комитетінің төрағасы Олег капитанов бастаған делегация келді, деп “ҚазАқпарат” ХАА тілшісі қала әкімдігінің баспасөз қызметіне сілтеме жасай отырып хабарлады.
Делегацияны Алматы әкімі Бақытжан Сағынтаев қабылдады. Тараптар екі қаланың қарым-қатынасын дамыту перспективаларын талқылады. Кездесуге қатысушылар денсаулық сақтау, білім беру, туризм, мәдениет және ШОБ салаларындағы ынтымақтастықтың Жол картасын әзірлеуге келісті.
Ресей делегациясы “Алматы – Санкт-Петербург: жаңа мүмкіндіктер аумағы”конференциясына қатысты.
“Қазақстан мен Ресейді мәңгілік достық пен бауырластық туралы шартпен расталған ерекше көне тарихи қатынастар біріктіреді. Біздің қарым-қатынастарымыз мемлекетаралық қатынастардың эталоны деп санауға болады. Алматы мен Санкт-Петербург екі елдің тату көршілігін нығайтуда үлкен рөл атқара алады. Айта кету керек, Алматы мен Санкт-Петербург арасындағы бауырластық қарым-қатынас 20 жылдан астам. Бүгін біз одан әрі ынтымақтастық үшін жаңа серпін бере аламыз”, – деді Алматы қаласы әкімінің орынбасары Ержан Бабақұмаров.
