Алматы прокуроры Берік Жүйріктаев саясаткер Жанболат Мамай жариялаған митингке қатысушыларға шара қолдану қаупін төндірді, деп хабарлайды агенттік тілшісі.
“Әлеуметтік желілерде жеке тұлғалар Алматы қаласында 2021 жылдың 24 сәуіріне жоспарланған санкцияланбаған митингке қатысуға шақыруда. Қала әкімдігі акцияны ұйымдастырушыға коронавирустық инфекцияны жұқтыру қаупінің сақталуына және бас санитарлық дәрігердің бұқаралық іс-шараларды өткізуге тыйым салуына байланысты оны өткізуге рұқсат бермеді. Алматы қаласының прокуратурасы мұндай акциялар өткізілген жағдайда қатысушылардың іс-әрекеттері “Қазақстан Республикасында бейбіт жиналыстарды ұйымдастыру және өткізу тәртібі туралы” Заңды бұзу ретінде сараланатынын ескертеді. Құқық қорғау органдары тәртіп бұзушыларға шара қолдануға міндетті”, – делінген прокурордың үндеуінде. Прокурор “мұндай акцияларға шақырулар, ұйымдастыру және қатысу үшін Әкімшілік құқық бұзушылық туралы кодекстің 488-бабы бойынша жауапкершілікке тартылатынын” еске салды.
Сонымен қатар, Жүйріктаев митингтің ұйымдастырушылары мен қатысушылары қылмыстық жауапкершілікке тартылуы мүмкін екенін атап өтті.
“Егер бұл әрекеттер айтарлықтай зиян келтірсе, онда айыптылар Қылмыстық кодекстің 400-бабы бойынша жауапқа тартылады. Бас санитарлық дәрігердің талаптарын бұзу әкімшілік құқық бұзушылық туралы кодекстің 425-бабы бойынша әкімшілік жауаптылыққа міндеттейді. Егер заңсыз акция өткізу жаппай ауруға немесе коронавирустық инфекцияны жұқтыруға себеп болса, онда бұл қылмыстық кодекстің 304 – бабы бойынша қылмыстық жауапкершілікке әкеп соғады”, – деді прокурор.
Алматы қаласының санитарлық-эпидемиологиялық бақылау департаменті Алматыда саясаткер Жанболат Мамай жариялаған митинг қарсаңында “ресми мәлімдеме” жасады.
“Қаланың “қызыл” аймақта болуына байланысты бұқаралық іс-шараларды өткізуге тыйым салынады” – делінген хабарламада.
