Алматы қаласының полиция департаментінде 400-ден астам полицей Наурызбай ауданында селдің жиналу қаупіне байланысты тұрғындардың қауіпсіздігін қамтамасыз етуге қатыстырылғанын хабарлады.
Қалалық полиция департаменті бастығының орынбасары Ізбасар Бектұров төрт аудандық полиция басқармасының қызметкерлері қатыстырылғанын айтты.
«Атап айтқанда Наурызбай, Алатау, Әуезов және Бостандық аудандары. Полиция қызметкерлерінің басым міндеттері — азаматтардың қауіпсіздігін қамтамасыз ету, қоршауды, көлік құралдарын бұруды жүзеге асырып, қауіпсіз қашықтыққа көшіру, сондай-ақ халықты хабардар ету. Полицияның келесі қызметтері жұмылдырылды: учаскелік инспекторлар, патрульдік полиция, мамандандырылған батальон нарядтары және аудандық ІІБ тергеу-жедел топтары», — деді Бектұров.
Алматы қаласы төтенше жағдайлар департаментінде Қарғалы өзеніндегі ағымдағы жағдай туралы ақпарат берілді.
«Қарғалы өзені Наурызбай, Әуезов және Алатау аудандарынан өтеді. «Қазселденқорғау» мәліметтері бойынша қазіргі уақытта көлден судың сыналануы тоқтатылды, эвакуациялық каналда жер үсті ағысы жоқ. «Қарғалы бөгеті» гидробекетінде су шығыны 3,33 текше м/сек құрайды, судың лайлануы 4 балл. Қазіргі уақытта қала шегінде өзен арнасының бойында орналасқан жеке тұрғын үйлер мен аула аумақтарын су басу жағдайы тіркелген жоқ», — деп хабарлады ведомстводан.
Бүгін Алматы қаласының Наурызбай ауданында селдің шығуы орын алды. Қала тұрғындары болған оқиға туралы хабардар болып, эвакуацияланды. Қазіргі уақытта су басқан учаскелерде Қарғалы өзені арнасының өткізу қабілетін арттыратын арнайы техника қойылды.
