Арнайы комиссия Алматы облысының мемлекеттік қызметкерлері туыстарына жер бөліп беріп жатыр деп мәлімдеген фермерлерінің сөздерін растады. Бұл туралы “ҚазТАГ”ақпарат агенттігі хабарлады.
Бұған дейін Алматы облысында жалға жер ала алмауына байланысты фермерлер мен билік өкілдері арасында жанжал туындады.
Ол кезде наразы болған тұрғындар Кеген ауданының әкімдігі ғимаратының жанында жиналып, БАҚ өкілдеріне туындаған жағдайды түсіндірді. Фермерлердің айтуынша, олар жер телімдерін жалға алғысы келеді, бірақ жер комиссиясының қызметкерлері, жерді өз туыстарына бөліп бергендыктен, тендерге қатысуға әр түрлі сылтаумен жібермеді.
Осыған байланысты фермерлер жергілікті атқарушы билік органы мен жер комиссиясының қызметкерлерін атқарып жатқан қызметтерінен босату қажет деп мәлімдеген.
Сондықтан арнайы комиссия тексеріс жүргізіп, нәтижесінде алматылық фермерлердің сөздері расталып қана қоймай, бірқатар заң бұзушылықтарды анықтады. Енді тұрғындар ашық тендерге қатысып, жер телімдерін жалға ала алады.
