Қылмыстық іздестіру және жедел әрекет ету арнайы жасағының қызметкерлері Алматы облысында арнайы операция -өткізіп, нәтижесінде бөтен мүлікті ұрлаумен айналысқан қылмыстық топ ұсталды. Бұл туралы облыстық полиция ведомствосының баспасөз қызметі хабарлады.
Арнайы операция Қарасай ауданына қарасты ауыл автожолдарының бірінде өтті. Қылмыстық іздестіру және арнайы базаның қызметкерлері осы қылмыстық топтың бес мүшесін қолға түсірді, олардың автокөлігінің жүксалғышында ұрланған мүліктер – ноутбуктер, қымбат тондар мен бағалы металдардан жасалған бұйымдар табылды.
Қылмыскерлерден жауап алғаннан кейін, топқа қатысы бар тағы бір тұлға анықталды. Қылмыстық топтың алтыншы мүшесі ұсталып, полиция бөлімшесіне жеткізілді.
Осыған байланысты Қазақстанның Қылмыстық кодексінің 188-бабы бойынша қылмыстық іс ашылды. Топтың алты мүшесіне қатысты сотқа дейінгі тергеу жүргізілуде. Олардан алынған “Мерседес С-600” және “БМВ” маркалы автокөліктері де іс материалдарына айғақты зат ретінде қоса тігілді.
Бүгінгі таңда күдіктілер қамауда. Алматы полиция департаменті қылмыстық топ бойынша тергеу барысын бақылауда. Сонымен қатар, келтірілген залал есептеледі.
Сурет: Inform.kz
