Алматы қаласының Медеу аудандық сотында алаяқтық жасады деп күдікке ілінген ішкі істер органдарының бұрынғы екі қызметкеріне үкім шықты, деп хабарлайды nur.kz жаңалықтар ресурсы.
Сөз Алматы облысы Еңбекшіқазақ ауданы полиция басқармасының бұрынғы бастығы Дәулет Самбетов пен оңтүстік астананың Түрксіб ауданы полиция ведомствосының учаскелік инспекторы Жұмат Самбетов туралы болып отыр.
Тергеу нұсқасына сәйкес, құқық қорғау органдарының бұрынғы қызметкерлері азаматқа белгілі бір сомаға қылмыстық іс бойынша бір күдіктінің ісін ауыр дәрежеден онша ауыр емес дәрежеге ауыстыруға уәде берген.
Нәтижесінде, бұрынғы полицейлер азаматты алдап, оның 1,2 миллион теңге қаражатын иемденген.
Алматы сотының шешімімен Дәулет Самбетов алаяқтық қана емес, сонымен қатар, пара беруге арандатушы деп танылды. Осы әрекеттері үшін ол үш жыл сегіз айға түрмеге қамау жазасын алды.
Сондай-ақ, Жұмат Самбетов алаяқтық жасағаны үшін кінәлі деп танылды. Медеу аудандық сотының шешімі бойынша ол үш жыл екі ай мерзімге бас бостандығынан айырылды.
Сурет: tengrinews.kz
