Алматы әкімі Бақытжан Сағынтаев 70-тен астам медициналық мекеменің басшылығымен онлайн-кеңес өткізді. Бұл туралы облыс әкімінің баспасөз қызметі хабарлады.
“Барлық күш коронавирустық инфекциямен күреске жіберілді. Бірінші басымдық-халықты қорғау. Барлық қызметтер жұмылдырылған. Бірінші кезекте біздің дәрігерлер, емханалар, ұйымдар тарапынан қажетті талаптар орындалуда. Негізгі мәселе: қала бойынша коронавирустық инфекцияның таралуына жол бермеу”, – деп атап өтті Бақытжан Сағынтаев.
Кеңеске қатысушылар медицина қызметкерлерін жеке қорғану құралдарымен қамтамасыз етуге, инфекциялық стационарлардағы дәрігерлер мен барлық санаттағы медицина қызметкерлерінің қауіпсіздігін қамтамасыз ету үшін қажетті санитарлық-эпидемиологиялық нормалардың сақталуына, сондай-ақ еңбекақыларына үстеме ақы төлеуге қатысты мәселелерді талқылады.
Кездесу соңында барлық медициналық ұйымдар жеке қорғану құралдарымен толық қамтамасыз етілгендігі атап өтілді.
Сурет: 7kun.kz
